به‌بؤنه‌ و ڕاوڕسومو به‌خاکسپارا و مامؤسا( جه‌لالی سه‌لیمی ) ... که‌مال هه‌ورامی

په‌ی جیاکه‌رده‌ی ئازیز مه‌رده‌کا جه‌یه‌کتری ، مه‌رگا ! به‌ڵایێ چاره‌سیا وکردێ نه‌وازیای حه‌تمی .. په‌ی ئه‌ره‌بڕیه‌یی هامده‌مه‌کا ، مه‌رگا ! لافاوێ سوری سیاوباوی سامناك .. ئاااخ مه‌رگ ! چند کۆستئاوه‌ر و به‌په‌له‌ و زوڕه‌س و زوخێزه‌نی !! داخ په‌ی ته‌مامو که‌سه‌کا ، که‌ساتێ جه‌ساته‌کا و ته‌مه‌نیشانه‌ مشؤم مێمانی ڕه‌زاقورسی چه‌رداوه‌ڕو بؤ به‌مێمانشاو کۆتایی به‌ژیواییشا بارؤ ....
خؤ من ئاره‌زوما و چه‌نی وێم گفتمدان ، ئازاره‌ و هیچ که‌سێوه‌ نه‌ده‌ و گه‌ر گوزارشت جه‌ مرؤ بییه‌یشو که‌سایه‌تی وێش که‌رؤ .. وێم پارزنو جه‌گرد ئازار په‌نه‌یاونایێ ، تابیاوؤ به‌وێ پارێزی قاچه‌کام جه‌شێلای مرۆجێوه‌ ، گه‌ر گوزارشت چه‌ مرۆچه‌یی وێش که‌رؤ و ژیوای مرۆچه‌ هام توخمه‌کاش نه‌شێونؤ .. به‌ڵام بڕواکه‌ره‌ ئه‌ی مه‌رگ !! گه‌ر هه‌رچێوێو هه‌رکه‌سێ بیێنی تابیاوؤ لا فریادڕه‌سی وه‌روده‌ممه‌نه‌ بیێنی ، تیرۆرست ئاسا کافرێوه‌س وه‌روده‌مینه‌ بؤ ، ڕووه‌ت که‌رێنێ ته‌وه‌نه‌سیاوه‌کێ ( که‌عبه‌ ) یو ده‌مو سه‌ڵه‌واتێوه‌ سه‌ره‌یت جه‌ لاشه‌یت جیاکه‌رێنی ، دماته‌ریچ چه‌وپه‌ڕو گه‌شکه‌یؤ کارده‌ وناویه‌کێ فڕه‌دێنێ سه‌رو جه‌سته‌ی بێ سه‌ره‌یت !! تاڕام گێرتێ جه‌ئه‌ره‌بڕیه‌و ( شه‌پۆله‌کا * )نه‌کا شه‌پۆله‌و خه‌می هورشا قرچنؤ !! تاوه‌کو (مانیاکێ* ) په‌ی دورکه‌وته‌ی یه‌کجاره‌کی تاته‌یشا حه‌سره‌ت په‌ی واتیله‌ و ( ڕؤله‌ی ) که‌ لێوان لێو په‌ڕ بێ جه‌ مهری به‌مانیایی هورنه‌کێشا ! تاوه‌کو( ته‌نیاکێ* ) هه‌ستنه‌که‌را دێوه‌زمه‌ و ته‌نیایی سه‌رو سینه‌یشاوه‌ ده‌وارش هوردان و په‌ی هه‌میشه‌یی نمازۆشا جیا ! تاوه‌کو ( هه‌ساره‌کێ** ) په‌ی ئه‌وه‌گێڵای هامسه‌ره‌کاشا هه‌رجه‌ وێره‌گاوه‌ تا به‌ره‌به‌یان چه‌مه‌ چه‌مشا نه‌ بؤ و هه‌سارێ نه‌ژمارا ، که‌چی هامسه‌ره‌کێشا هه‌رنه‌گێڵاوه‌ ، ئیتر سه‌رناکاشا به‌ ته‌قا و هه‌ساراوه‌ و چه‌مه‌کاشا هورنه‌کێشا جه‌ ئاوێ !!
یارا ! .. هؤشتا نه‌شؤ !!
که‌مه‌رگ هامشانو ژیواییما ئامانه‌نه‌ بییه‌یی و هه‌نگامێ منیؤ ، پێسه‌ وه‌رگێ هاری ئاورای ئینا پارێزو ژیوایمانه‌ .. ئازیزا ! باردێش دلێ ئاوه‌زیتاوه‌ که‌ مه‌رگ نزیك نزیکا و بارته‌قاو سێوه‌ر و جه‌سته‌ی بؤوه‌ به‌سێوه‌ر و ژیوای ... شێلگیر و شێتگیرانه‌ هه‌ر ژیوای پاش هورکه‌وت ، وه‌ختوناوه‌خت مه‌زانؤ ، دره‌نگو زوش په‌ی نیا .. که‌س که‌سی به‌قه‌رز مه‌دؤ ، تیره‌ و وێش دلێ که‌مانێنه‌ به‌ر مارؤو ، نه‌ک به‌ته‌نیا خود و وێما گێره‌ چه‌نی پێکایما ئازیز و وه‌شه‌ویسه‌کایچما زه‌خمی و بریندار که‌رؤ .. په‌وکی پێویسا ئانه‌ هه‌میشه‌ یاده‌وه‌ریمانه‌ بؤ ، که‌ مه‌رگ کردێوه‌ حه‌تمییا و ته‌نیا ئاکه‌سێ مه‌مرا که‌ جه‌ ئه‌دای مه‌با .. جا ، چه‌نی ژیومێ ؟! وه‌ڵامه‌که‌ش که‌رؤ ئانه‌ی چه‌نی مرمێ ! .. ژیوای سوکوسه‌لیم مه‌رده‌ی سوکوسه‌لیمش ئینا شۆنیؤ .. مامؤسا جه‌لال ژیوایچ مه‌رگێ په‌ڕان په‌ڕ ، په‌ڕا جه‌ ئه‌زمونو ماریفه‌تی په‌ی به‌شدار بیه‌کا و ڕاو ڕه‌سمو په‌رسه‌نامه‌ییو به‌خاکسپاراییش ..
ئاخر ئازیزا ..! هه‌ر پاسه‌ که‌لاو گردیماوه‌ ئه‌زمونکریان ، که‌موفره‌ گرد جگه‌رگۆشێ وهامسه‌ره‌کا گرد که‌سێوه‌ که‌وه‌ختێ مرؤ ، هه‌ساره‌ و چه‌ماشا ته‌قؤو شیوه‌نش په‌ی گێڵنا .. به‌ڵام ئاسایی نیا په‌ی مه‌رگو مامۆستا جه‌لالی هه‌رکه‌سێوه‌ ته‌نیا په‌ی چند ده‌مژمارێ هامڕایش که‌رده‌بؤ ( هه‌ورامی / سۆرانی / بادینی / فارس / ئه‌ره‌ب / تورك / سویدی ) پێوه‌ره‌ شیوه‌نش په‌ی گێڵناو جه‌یه‌ك چرکه‌نه‌ ئاوه‌ و چه‌ماش په‌ی مجا ! .. ئینه‌ په‌یامو ئینسانی مامۆساین که‌گردو ئینسانه‌کاش به‌ که‌لتوره‌ جیاوازه‌کاشاوه‌ ده‌ورو مه‌رگیشه‌نه‌ کۆکه‌ردێنێ .. سه‌رنجو ئێمه‌ومانایچ کۆکه‌رؤوه‌ و ماچمێ مامۆسا جه‌لال یه‌ك پارچه‌ خود و په‌یامی ئینسانی بێ .. مه‌رجا ئێمه‌یچ نهێنیه‌کا ژیوای مامۆسای که‌شف که‌رمێ ، تاوه‌کو مه‌رگێ قورس مرمێو .. سه‌رێ به‌رز ، په‌ی که‌سوکارو ئازیزو وه‌شه‌ویسه‌کاما بازمێ جیا .. جه‌ دماجاره‌نه‌ ماچو ، مامۆسا جه‌لال هیچ واتیلێوه‌م نه‌دیؤ گوزارشتو مه‌رگو ناوه‌ختو تؤکه‌رؤ ، په‌وکی ته‌نیا ئانه‌ی ماچو ، ئافه‌رین په‌ی ژیوایتو جؤرو مه‌رده‌یت ئه‌ی نمونه‌و ئینسانی !!

*شه‌پۆل و مانیا و تانیا / نامێ جگه‌ر گۆشه‌کا مامۆسا جه‌لالیه‌نێ
** هه‌سێره‌ / نامێ هامسه‌ره‌ و مامۆساینه‌